從我一班師弟身上看到現今青少年的處事方法及態度

今天是星期六, 下午大約一兩點, 我步行去新都城吃午餐. 路經學校正門, 當然會望望母校, 回憶一下過去. 至畢業後, 七年來我每次經過呂潤財都會望一望, 從不間斷. 今天亦不例外, 望到現在的籃球隊在籃球場練習, 更加專心地望著他們射籃.

誰不知我邊行邊看, 看到他們不斷在已經拉下了的籃框"入樽", 最後, 籃框倒下了.

我突然間覺得, '有無搞錯呀?' 我在校隊五年以及之後在母校教波都未發生過, 他們究竟知不知道自己在做什麼? 那裡是學校, 不是街場啊! 我很嬲, 我在想應不應該入去了解一下. 我猶疑. 但我當時腦內只有一個想法, '我在呂潤財長大.'

我進去了.

我問他們,
'邊個拉個框落黎架?'
'走左啦, 岩岩行左出門口.'
我走出門口, 大聲叫他們二人.
'我以前讀呢間學校架, 我以前係籃球隊隊長.'
'係呀? 握握手先.'
'你拉爛左個框呀?'
'做咩呀?' 他有丁點兒驚.
'係咪你整爛個框呀?'
'係呀. 做咩姐?'
'你做咩拉爛佢呀?'
'下...'
'你叫咩名呀?'
'下...做咩姐?'
'你叫咩名呀?' 我大聲地問.
'XX業.'
'你中幾呀? 咩班呀?'
'下...中四, 4E.' '下...整爛個框唔駛記大過呀?' 語帶微笑問.
'根據手冊整爛個框最多都係記小過姐.' 站在旁邊的同學插話.
'好好笑呀?' 我怒目相向那個站在旁邊的同學.
'唔好意思.' 仲要鞠躬.
'你地有咩資格打籃球隊呀?' '點解你要整爛個框呀?'
'阿SIR叫...'
'阿SIR叫?' 我極之驚訝地叫了出來! '咁得啦, 我同你阿SIR講話你同我講佢叫你拉爛架啦. 你走啦.'

我走進校內, 見到校長在旁邊, 我跟其他籃球隊的同學說,
'你地點解見到有人拉個框落黎都唔阻止架?'
沒有學生回應, 直到一個學生走過來. '佢上緊籃JA.'
'廢話! 唔通搵把掃把拉落黎咩?'
'咁佢上緊籃丫嘛!'
'上籃? 我親眼睇住佢拉落黎喎!'
'妖, 你講晒啦咁!' 轉身走.
'你咩態度同我講野呀?' '你叫到個框咁樣射波唔得架? 一定要掂到佢架?'

我很氣憤, 很心痛. 為什麼一定要這樣對學校呢? 有沒有考慮到其他同學? 爛了, 其他同學便少一個籃框用. 自己會不會受傷? 會不會令到其他正在練習的球員受傷? 知不知道學校訂一個籃框要多長時間? 自己籃球隊練習會不會受到影響?

我心裡面有另一些疑問:
1) 為什麼校工沒有提醒?
2) 校長有否及早注意到?
3) 為什麼沒有教練或老師在場?
4) 籃球隊隊長在哪裡?
5) 為什麼那位同學拉下籃框後, 可一走了之?
6) 為什麼他沒有告訴校務處?
7) 為什麼沒有同學叫他留下來?

我們以前每個籃球隊員都要經過嚴格選拔, 所以技術全都很不錯. 更遑論能否拉到籃框! 但同樣事情發生過多少次? 零. 可能現在要打籃球隊比以往容易, 同學都沒有我們那麼重視.

唯一可以肯定的是, 我比他們更愛呂潤財.

我們東華三院中學校歌最後一段是這樣的:
'愛東華, 愛母校, 他日成材, 服務社會, 報恩厚'
我不知道他們現在是不是唱同一首校歌, 但我從他們身上看不到這段歌詞.

以上內容及對話絕無誇張, 可問當時在場的其他同學及校長.