一切都要追溯到2007年11月.
當時籃球體育事工(BSM)舉辦了一個籃球賽, 我有份做球證及出隊. 隊員是我當時教的呂潤財紀念中學(我母校)女子籃球隊的數名小女孩. 我們最後得了第2名(獎狀至今還放在我的床頭). 當我在等她們更衣的時候, 在門外看到一名女球員, 身穿Kobe球衣, 剛才亦有份落場比賽. 我們說起話來, 得知她亦很喜歡Kobe, 我們交換了聯絡, 希望日後BSM有活動都可以讓她參加.
2009年, 我回歸, BSM有籃球教練班, 意想不到的我還留著她的電話, 於是我告訴她這個消息.
某日, 她打電話給我, 說Kobe過幾天會來香港, 問我要不要一起去看Kobe. 我很想去, 可惜當天我要工作, 不能去. 數天後, 我看報紙, 見到她跟Kobe合照 (極度妒忌!). 她就是我今次訪問的主角 - Vivian, The ultimate Kobe's Girl in HK.
V: Vivian L: Lok
L: 聽聞你好鍾意KOBE, 你點解咁鍾意佢呢? 或者係佢有D咩吸引你?
V: 講真, 當年係電視睇入樽賽(應該係1997), 見到佢有靚仔, 又型, 最後仲拎埋入樽王TIM! 個時開始就勁留意佢!
而經過咁多年, 睇到佢既成長, 佢既熱誠, 我從來未見過有其他球員好似佢一樣. 佢係有心目中有好崇高既地位!
L: 咁你鍾意左佢幾耐?
V: 自99年開始, 10年到啦.
L: 咁耐以黎一D都無變心?
V: 絕對無! (非常肯定同答得好快!) 我對佢好專一! 我有留意NBA, 但無一個球員及得上KOBE!
L: 當佢發生性醜聞既時候都無?
V: 真係無. 當我聽到既時候我有問,'點解會係佢?' 我有唔開心. 我個時諗拎唔到冠軍唔緊要, 可以再努力再拎, 但唔需要做D咁既事. 我個時想同KOBE講,'唔理發生咩事, 我都會繼續支持你!'
L: 嘩, 咁KOBE對你黎講係咩?
V: 佢對我黎講唔係偶像咁簡單, 佢係我學習既對象. 我唔在乎佢既成就, 我欣賞佢既精神, 努力同埋堅持.
L: 唔. 咁你都知佢係一個好勤力既球員, 佢呢種態度同韌力對你有咩影響?
V: 佢既態度的確係影響左我對生活既睇法, 包括對事業, 工作, 同埋同屋企人既態度. 佢令我對做每件事都更加堅持同盡力, 唔係三分鐘熱度. 當然, 佢令我更熱愛籃球.
L: 你會唔會覺得好多人都唔鍾意KOBE呢?
V: 會呀! 我屋企人囉! 我爸爸同我細佬! 不過唔緊要, 佢地會對KOBE改觀, 佢地可以感受到我對KOBE既熱情.
其實我都知點解, 佢好自大, 我都曾經為此而失望過. 之後我明白佢唔係故意想傷害人, 相反, 佢既表現令好多人由憎佢變成支持佢.
L: 我知道之前KOBE黎香港, 你都在場, 感覺如何?
V: 第三次啦! (搶答) 當我知道呢個消息之後, 我立刻用唔同既方法去撲飛!當時NIKE搞左個比賽, 係五日內SEND一張相去表示你有幾愛KOBE, 我二話不說, 個晚即刻搵出自己所有有關KOBE既野出黎影一張相, 列晒所有KOBE既紀念品出黎. 之後我好擔心無機會拎呢兩張飛. 所以我叫埋我細佬參加, 用佢名參加多一次. 唔單止咁, 我仲叫左我D好朋友幫手拎飛, 結果比我成功拎到4張! 加埋之前成功既, 總共有8張! 仲問你(即係我!)去唔去TIM!
之後準備就緒, 將我最能展示熱愛KOBE既一面展現比佢睇! KOBE衫, 褲, 鞋, 仲漏夜整張自製大海報去表達我對佢既心聲, 帶住興奮既心情去搵佢! (她甚至將KOBE的剪報全部過膠!)
L: 有無覺得多左人支持KOBE?
V: 絕對有! 估唔到咁多人去!
L: 我亦都知道你得到KOBE親筆簽名球鞋喎! 感覺如何?
V: 嘩, 夢境成真啦! 一世難忘! 今生無悔呀! 心跳從未如此快過!
L: 哈哈, 除左對鞋外, 你仲有無其他KOBE既野?
V: 當然有! KOBE藍色, 白色, 黃色, 紫色既波衫, 由ADIDAS到NIKE既波鞋, 雜誌, 台灣買既撲克牌, 杯, 係湖人主場買既冠軍像等等.
L: 嘩咁多, 平時有無著?
V: 梗係有! 開心既時候, 唔開心既時候就抱住, 連我既公仔都係著住KOBE既衫!
L: 有無比爸爸媽媽話浪費錢?
V: 話係瘋狂! 洗得太多! (笑)
L: 佢地會唔會話你男仔頭?
V: 不嬲都咁講, 即使係長頭髮. 不過呢個係我性格啦!
L: 講到呢到, 邊件KOBE既野係你最喜歡架?
V: 今次呢對KOBE鞋同波同海報! 因為佢地全部簽晒名, 唔係呢張海報都唔會有呢兩樣野! 如果唔係香港人咁含蓄, KOBE都唔會留意到我! (編者按: VIVIAN曾經到美國留學, 故性格有少許洋化)
L: 好, 等我而家問D比較私人既問題. 你介唔介意講下你既職業?
V: 我係長青中心入面既社工.
L: 咁係工作上有無用到KOBE既地方?
V: 有架! 我帶親長者旅行團就著KOBE衫, 原因係容易比老人家認到.
L: 如果有人講KOBE壞話, 你會有咩反應?
V: 為KOBE辯護. 比佢地知道KOBE既優點, 特別係佢既付出.
L: 唔. 除左KOBE外, 仲有無其他喜愛既球員?
V: YAO (姚明).
L: 最想KOBE去咩隊?
V: 繼續打湖人啦! L.A.係佢既代號!
L: 咁你自己本身識唔識打波?
V: 都識既, 打波於娛樂囉.
L: 係香港, 好似你咁鍾意打波既女仔已經好少, 好似你咁鍾意一個球星更少, 你對呢樣野有咩睇法?
V: 我覺得KOBE可以令香港既女仔更認識籃球. 比佢地知道籃球唔只係運動咁簡單, 可以睇到球員既努力付出同積極既態度比世界同香港人知道係可以用係其他方面.
L: 新球季黎啦, 你認為KOBE今季拎唔拎到MVP同總冠軍呢?
V: 難度高D. 因為湖人有新既班底. 不過如果KOBE既隊友能夠配合到佢, 佢有好大機會攞MVP同總冠軍!
L: OKAY. 咁你搵老公係咪一定要係KOBE FAN呢?
V: (笑!)唔一定, 但係我可以感染到佢係, 咁個滿足感會大D! (好野!)
以前男友係DUNCAN FAN, 所以我地成日敵對!
L: 哈哈. 最後, 有咩想同其他KOBE FANS同KOBE HATERS講?
V: 如果真係KOBE FANS的話, 就唔好將焦點放係佢既名同利上, 應該放係佢在場上既表現, 對球隊既付出同精神, 作為我地學習既榜樣!
另外對KOBE HATERS, 睇下KOBE既努力, 堅持, 佢不斷尋求進步既精神. 你睇下而家NBA有好多好好既球員, 但係你咪個個都會努力咁練波, 不停咁增加自己既'武器'? 而KOBE就正正係呢樣野最值得人學習!
後記:
在香港, 像她一樣對運動員瘋狂的女孩子? 少之又少. 要對所謂的'明星'卻很多. 從言語中發現到, VIVIAN對湖人隊既認識, 對生命樂觀既態度, 講起KOBE時堅定既眼神同興奮地講出見KOBE的準備確實令我覺得KOBE對她有重大的影響和改變了她對做事的態度.
記得曾經有人說,'對一件事情充滿熱誠, 係成功既起步' VIVIAN都一樣, 她希望學習KOBE的努力去做好自己的事, 我衷心希望她會成功. 而她遠景KOBE能夠令到更多香港女孩喜歡籃球? 我亦有此願! 不過個人認為: 在香港環境, 很難.
其實做這篇訪問已是數周前的事. 只不過之前比較忙, 加上自己懶 (要知道寫部落不是數分鐘草草了事!), 到現在才拿下決心進行整理. 不知道為什麼我突然間很享受整理這篇訪問的過程. 想來想去, 相信原因只有一個, It must be Kobe!
*部份內容經過修改.
*本篇內容只反映受訪者個人意見, 絕無任何歧視成份.
No comments:
Post a Comment
Drop me a line! I will hit you back!